तुझ्याचसाठी...

तुझ्याचसाठी...

तू तहानली असताना

मी पाऊस होवून बरसावे,

अन पहाट तू होताना

मी धुके होवून पसरावे

उमलताना माझी फुले

ती पहाट तुझी मागती,

होवून वारा वाहतो मी

तुझ्याच रानाभोवती

तू किलबिलाट पक्षांचा

सांजेच्या घरट्यामधला,

मी सूर्य मावळतीचा

क्षितीजामधे लपलेला

तू ओळ कवितेमधली

मी शब्द तयाचा व्हावे,

तू ठेका शब्दांचा

त्याचा आशय मी व्हावे

वीजेसारखा स्पर्श तुझा

गात्रांचा थरकाप तुझ्यासाठी,

स्पंदनात अडकली तू

घे मिठीत जळण्यासाठी

’मी’पण माझे ’तू’मय झाले

जगणे मरणे तुझ्याचसाठी,

तूच शरीर अन तूच आत्मा

मीही आता तुझ्याचसाठी

-प्रथमऋतू