कविश्रेष्ठ कुसुमाग्रज

आज कविश्रेष्ठ कुसुमाग्रज यांच्या जन्मशताब्दीनिमित्त त्यांच्या काही निवडक कविता...
’जागतिक मराठी दिनाच्या’ हार्दीक शुभेच्छा...

१) कौतुक म्हणजे
फुलमाळांची रास मनोहर,
त्याच फुलांची दुसर्‍या दिवशी
कचरा कुंडीत पडणारी भर

२) वडिलधार्‍या या पायांना
शतादिकांचे हात स्पर्शती,
खंत एक की, उरला नाही
हात एकही खांद्यावरती

३) आकशपण हटता हटत नाही
मातीपण मिटता मिटत नाही
आकाश - मातीच्या या संघर्षात
माझ्या जखमांचं देणं
फिटता फिटत नाही

४) गेलिस ठेवून मस्तक जेव्हा
अगतिक माझ्या पायावरति,
ह्या पायांना अदम्य इच्छा
ओठ व्हायची झाली होती

५) भॆट जाहली पहिली तेव्हा
सांज पेटली होती,
रिमझिम वर्षेतूनि लालसा
लाल दाटली होती

काळ लोटला आज भेटता
नदी आटली होती,
ओठांवरती उपचारांची
सभा थाटली होती...

-कुसुमाग्रज