उन्हाचा...

जन्मभर तुडवेन मी रस्ता उन्हाचा
पण तुला स्पर्शू नये ठिपका उन्हाचा

यामुळे तर ऊन्ह हे जळते तुझ्यावर
रंग नाही एवढा गोरा उन्हाचा

मी जशी खिडकी उघडली, आत आला
केवढ्या वेगामधे तुकडा उन्हाचा

दग्ध ओठांनी तुझ्या केसांमधे मी
माळला होता कसा गजरा उन्हाचा

घालतो पायामधे चपला धुळीच्या
हिंडतो बांधून तो पटका उन्हाचा

राहते माझ्यासवे छायेप्रमाणे
जीव माझ्यावर कसा इतका उन्हाचा

दिवस ढळला, सांज झाली पण अजुनही
उडत आहे मंदसा धुरळा उन्हाचा

- वैभव देशमुख